Jul 18, 2008

ميدالية مضمونة لعمان في الاولمبياد

امس التقيت بصديقي العزيز شنجوب في سوق السمك والمفاجأة انه كان لابس بدلة تراك سوت حمرا وعليها شعار اولمبياد بكين وكان على غير العادة فرحان ويضحك .. فكان سؤالي المباشر عن سر هذه السعادة ؟ .. صاصخني فى أذني شنجوب عن يسمعوه .. بتسمع قريب ان شاء الله وبتشوف اخوك شنجوب طالع في التلفزيون ومعلق ميدالية ذهبية او ثنتين على صدره وشايل ورد ويسلم على العالم !!؟؟
ما خلص شنجوب كلامه الا وانا اصعقها ضحكة خلت كل الناس بو في السوق تشوف علي ! شنجوب طبعا ما عجبته الصقعة .. وقال وهو ماخذ في خاطره : ما عليك ولد النوخذة باتشوف .. وحتى لو كنت ما تقدر المواهب .. بتشوف وتسمع !!
سالت شنجوب بجد : كيف اخوي فهمني .. تراني احيد ان رياضتك المحببة هي لعب التوفة مع صغيرين الحارة او ملاتات السنانير وشناجيب الساحل ؟
جاوبني شنجوب : نوبة تمرين .. وفوقه انا اتمرن في الشغل كذلك .
سالته : كيف يعني تتمرن في الشغل ؟
جاوبني وهو متحمس : تعرفني اشتغل مراسل .. ومكتبنا مقابل المطار بو لازم اسيرلو مشي يومية .. وبما انه الاخوة في البلدية نسيوا يسويو ممر مشاة فوق الشارع .. لازم اقطع الشارع ركض بسرعة عشان ما يدعمونا ! .. تو انته عاد تخيل كم مرة انا سير وجاي في اليوم .. وكان رعاة الاولمبياد .. المية متر يركضوها في عشرة ثواني .. انا اركضها في خمس ثواني !! .. حلاة الروح اخوي تخليك تركض كما السنور بو تلتوه الكلاب .. وبعدين انا ما ابغي استوى قيمة (لحم مفروم) .. كما الباقين .. الله يرحمهم !!
فعلا منطق شنجوب صحيح .. بس فيه مشكلة ! كيف نقدر نقنع اللجنة الاولمبية تقنع بلدية مسقط يبنوا لنا شارع بدون ممر مشاة وبنفس مواصفات جسر المطار في الملعب الاولمبي في بكين !؟ عشان اخونا شنجوب ينطلق كما الزهبة في خمس ثواني ويجيب لنا أول ميدالية ذهبية في تاريخنا .. بدون ما يستوي لا قيمة او كوارع !! مو رأيكم شيمة .. تخبروا البلدية .. ترا الميدالية مضمونة ؟؟

No comments: